Б.Хурц даргыг минь хулгайлчих вий

2013-06-10 00:07 | 20 сэтгэгдэл

-Б.ХУРЦТАЙ ХАМТ МОНГОЛЫН АТГ-ЫН НЭР ХҮНД УНАХ НЬ-

 

АТГ-ын дэд дарга Б.Хурцыг Германы шүүхээс албадан авчрах тушаал гаргасан байна. Гэвч хурандаа Б.Хурц очсонгүй. Аятайхнаар хэл­бэл “богтлоод”, аягүйхэн хэлэхэд хүчээр аваачна гээд Холбооны өмгөөллийн газ­раас дэлхий нийтэд зар­лачихлаа. Харин АТГ-ын дэд дарга Б.Хурц хэнд найдаад ихэрхэж сууна вэ.

Хуульзүйн яамны холбогдох албаны хүмүүс “Ийм шийдвэр гарсан бол Гадаад харилцааны яаманд бичгээр мэдэгдэх ёстой” гэсэн. Гэтэл Гадаад харилцааны яамны Консулын газрын захирал “Тийм бичиг ирээгүй” гэжээ.

 

Харин Германы нэр бүхий гурван вэб сайтад “Б.Хурц хүн­дэтгэн үзэх шалтгаангүйгээр шүүх хурлыг тасал­лаа. Тиймээс Холбооны өм­гөөллийн газраас түүнийг шүүх хуралд албадан авч­руулахаар шийдвэрлэж хур­лыг хойшлуулав” хэмээн ний­тэлжээ.Дээрх вэб сайтын мэдээлэлд АТГ-ын дэд дарга Б.Хурц чухам ямар хэрэгт холбогдсоныг дахин дурдаж “эх орондоо эрх чөлөөтэй байгаа Б.Хурц удахгүй болох шүүх хуралд оролцох эсэх нь тодорхойгүй байна” гэсэн байна.

Ийнхүү Монгол Улсын Ав­лигатай тэмцэх газрын дэд дарга Батын Хурцын гадаад нэр хүнд Европт лав унаж яваа бололтой. Гэтэл манай төр, эрх баригчид авлигатай өдөр шөнөгүй, цаг наргүй, ёстой л “чөмгөө дундартал” тэмцэж байгаа шүү дээ. Авлигатай тэмцэх газрын шинэ удирдлагуудыг томилсноос өнөөдрийг хүр­тэл тус газрын дарга На­ваансүрэнгийн Ганболд биш, дэд дарга Батын Хурц л гол дүрийг бүтээсээр явааг олон нийт мэдэж байгаа. Одоо бид Б.Хурц даргыгаа хааш нь нууж, хамгаалж үлдэх болж байна аа. Хэрэв энэ цаг үед  АТГ-ыг МАН-ын улстөрч  удирдаж, удирдлага нь ийм хэрэгт холбогдон Европт, дэлхий дахинд нэр хүнд нь сэвтсэн бол хэвлэл мэдээллийнхэн хэрхэн дуулиан дэгдээж, дугаар бүртээ “хадаас” болгож байхсан бол гэдгийг төсөөлөхөд амархан байгаа биз. Тэгэхээр АТГ-ын дэд даргын нэр хүнд, түүнийг сонгосон УИХ, цаашлаад гар сэтгэл нийлэн ажиллаж буй Засгийн газар нь тун хүчтэй байгаа аж. Хүчтэй байгаа учраас хэвлэлийнхнийг айлгаж, дуугүй болгож чадаж байгаа бололтой юм.

АТГ-ын дэд дарга Б.Хурц Монголд байх хугацаандаа юу “хийж, бүтээсэн”-ийг олон нийт сайн мэдэж байгаа. Магадгүй Ганцхудагийн урьдчилан хорих төв болон бусад хорих ангид очоод тоолчиход түүний ажлын хэмжүүрийн нэгээхэн хэсэг гараад ирэх биз ээ. Төрийн ордонд спорт хувцастай нөхөр гараа халаасандаа хийгээд алхаж явах нь сүртэй л байдаг юм билээ. Хажуугаар нь өнгөрөх улстөрчид хүртэл “Сайн байна уу,  Хурандаа” гээд л. Магадгүй нэг удаагийн тохиолдол гэх байх л даа. Гэхдээ Монголд ирснээс хойшхи хоёр жилийн хугацаанд тэр “том” байгаа гэдэгтэй хэн ч маргахгүй болов уу. Хэрэв Төрийн тэргүүн ч хуулийн өмнө жирийн иргэнтэй ижил эрхтэй нь үнэн бол “МИАТ”-ийн гэх хэрэгт Б.Хурц шалгагдах л учиртай. МАХН-ын дарга Н.Энхбаярт холбогдох хэрэгт ч түүнээс мэдүүлэх авах л ёстой байсан. Тэгэхээр дайрах ёстой бүхнийг тойрсоор ирсэн “том дарга”   Б.Хурц одоо Германы шүүхийн танхимд албадлагаар очиж балрах вий дээ.

Ямартай ч Монгол Улс өөрийн иргэнээ барьж өгөхгүй гэсэн хуулийн заалтаар эдүгээ төр нь “хүүгээ” хамгаалж байна. Харин тэр өөрөө иргэн Д.Энхбатыг хууран мэхлэх, ухаан алдуулах зэрэг арга хэрэглэн тэргэнцэр дээр түрж аваачаад өгчихсөн гэмтэй хүн. Энэ бол хүсэх зүйл биш. Битгий тэгээсэй гэсэн хүсэл байна. Монгол хүний хувьд АТГ-ын дэд даргаа “албадан гүйцэтгэх ажиллагаа” гэгчээр “явуулчихмааргүй” байна. Эсвээс хүн хулгайлсан хэрэгтэй хүнийг яг тэр аргаар нь авч явна гэж Монголыг, АТГ-ыг шившигт хутгах юм болов уу.

Монгол Улс авлигатай түүхэнд байгаагүй хүч, эр зориг, эрмэлзэл гарган тэмцэж буй талаар очсон газар бүртээ ярьж дэлхий нийтэд энэ тухайгаа мэдээлж буй. Гэтэл тэмцэгч дарга нь Германы шүүхэд хэргээ шийдүүлээгүй “бултаж” явааг юу гэж ойлгох вэ. Энэ бүх мэдээллийг дэлхийн олон сая уншигчид харж байгаа. Нутаг нэгтнээ олон улсын хууль тогтоомж зөрчин байж хил дамнуулан барьж өгсөн түүнийг Германы шүүхээс арайхийн суллагдаад ирэхэд нь АТГ-ын дэд даргын суудлыг зэхэж, хадгалж байгаад өгсөн ч тэрбээр хайр даасангүй. Монголын хэвлэл мэдээллийнхэнд “Баярлалаа” гэдэггүй юм аа гэхэд “Сайн байна уу” ч гэхээ больсон. Харин түүнийг цаг тухайд нь Германы шүүхэд мэдүүлэг өгөх, хуралд оролцох зэрэг үүргээ биелүүлээгүйгээс болж өөртэйгээ хамт улсынхаа нэр хүндийг гутаавал өрөвдөх шалтгаан үгүй билээ. Иргэн Б.Хурцыг хайрлах эсэхээс үл шалтгаалан Монголын АТГ-ын нэр хүнд Европт унаж, Евро бүс бидэнд хаалттай болж буй харамсалтай цаг үеийг тэр авчирлаа.

 

У.Оргилмаа

Эх сурвалж: dorgio.mn



Манай сайт танд таалагдаж байвал LIKE хийгээрэй. Танд баярлалаа.

Холбоос агуулсан сэтгэгдэл нэмэгдэхгүй болохыг анхаарна уу.
АНХААРУУЛГА: Уншигчдын бичсэн сэтгэгдэлд www.dorgio.mn хариуцлага хүлээхгүй болно.
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 7711-4747 утсаар авах болон сэтгэгдэлийн доор байрлах "сэтгэгдэлийг устгах" хэсэгт хандана уу.
:) :( :-P :-D :-O ;-) 8-) 8-| >:( :-/ :(( 3:) O:) :-* <3 ^_^ -_- o.O O.o >:O :v :|] :like